Apaixonada da natureza, dos animais e das pequenas cousas, o monte foi o meu lugar favorito dende que teño memoria ❤️. Meu avó era pastor e xa dende cativa debecía por acompañalo co gando. Adoro a paz, a tranquilidade e a calma que a foresta ofrece e o meu día perfecto pasa sempre por unhas zapatillas cheas de terra.
Din os que me coñecen que son unha boa “escabichadora”, cunha curiosidade insaciable polo que nos rodea, pola nosa terra, polas súas xentes e pola súa historia 🧐. Sociable e alegre sempre vexo o vaso medio cheo, o que non quere dicir que tamén teña o meu carácter, como boa tauro! 🐃
En contra do que moitos pensades, a miña profesión e dedicación principal é a fisioterapia. Especializada na área deportiva e no exercicio terapéutico, teño a inmensa sorte de axudar aos meus pacientes e alumn@s a recuperar e manter a súa saúde no meu centro 🤸🏽♀️🧘♂️.
Alén desa ocupación, xestiono tamén un aloxamento turístico, no que comparto coa xente que o visita os lugares máis fermosos da terra na que vivo, Allariz, nunha casa antiga dunha pequena aldea rodeada de montañas. Para min, un lugar idílico!
Poño paixón e agarimo en todo aquilo que fago, como é o caso de Galiza de Cabo a Rabo, co que desfruto, penso que até máis ca vós, preparando cada escrito con ilusión á espera de que vos guste!