Xa fai un tempiño que descubrín esta xoia da que vos falei onte precisamente. Á dereita do Miradoiro de Pé do Home, a escasos metros, podemos contemplar esta singular estrutura etnográfica e as vistas que nos ofrece cara o canón do Sil.
Encargada de protexer as colmeas contra os osos e outros animais, e coñecida para os nosos irmáns portugueses coma “silha do urso”, estas construcións adoitan situarse lonxe das vivendas, en terreos con pendente e cunha orientación ao nacente ou ao mediodía. É moi importante para as colmeas o aproveitamento da luz solar e a protección contra fortes ventos.
Os seus muros, de entre dous e tres metros de altura, soen estar construídos cunha cachotería en seco de lousas de xisto e un capiado superior feito con lousas de maior tamaño para evitar a entrada de animais. Tamén contan con algo para gardar o material de mantemento e unha pequena porta de acceso, normalmente de madeira. A superficie interna adoita estruturarse en longas e estreitas terrazas escalonadas onde se instalan as colmeas.
En Galicia, podedes atopalas tamén en outras zonas coma O Courel, Os Ancares, as montañas ourensás… e aínda que as que teño visto son de pranta circular ou ovalada, seica hai constancia de algunhas rectangulares. Tamén abundan noutros lugares coma o norte de Portugal e Asturias.
Xa sabedes, este pequeno desvío é máis que obrigatorio! Aquí vos quedan unhas fotiños a maiores destes tres miradoiros que están practicamente xuntiños! 
