Fai pouco falábavos das minas e os fornos da Pontenova e de como o mineral era transportado ata o cargadoiro de Ribadeo, hoxe reconvertido nun fermoso mirador. Pero xa entón vos avisei que esta era unha vila con moito máis que ofrecer.
Son dignas de admirar as súas maxestuosas casas indianas, presentes sobre todo no barrio de San Roque e propiedade de xente que marchou facer as Américas e voltou con cartos suficientes e vontade de rendir homenaxe ao país polo que fora acollido. Son unha clara mostra do desenvolvemento urbano do século XIX e comezos do XX.
Na praza de España, corazón histórico da vila, podemos ver a Torre dos Moreno do século XX (en obras actualmente) e o pazo dos Ibáñez, do século XVIII, sede do concello hoxe en día.
A igrexa de Santa María do Campo, o Convento de Santa Clara e a capela da Trinidade e a de San Miguel tamén merecen unha visitiña. E na rúa Muralla podemos contemplar aínda un tramo da antiga muralla medieval.
E como non, o porto, o parque da Atalaya, a antiga aduana, o cargadoiro e o forte de San Damián, parte importante da historia de Ribadeo.
Moi preto podemos achegarnos ao fermoso pobo de Rinlo e dar un paseíño pola costa e as súas antigas cetáreas naturais así como ata a xa ben coñecida Praia das Catedrais.























