Roteiro do Camiño Vello de Aldosende PR-G 249

Este percurso duns 11km lineais (é dicir, 22km se se fai ida e volta) pode comezarse ou na aldea de Aldosende ou no miradoiro Cabo de Vila xa que vai dun lugar ao outro.

A pesar de que todo o roteiro está perfectamente sinalizado e ben coidado, considero que non é especialmente doado nestas alturas de ano. Ten algunha subida e baixada que en días de choiva ou xeada, coa mestura de follas e pedra, a fan especialmente esvaradía, pese a contar con axudas técnicas para asegurarse mellor nestes tramos.

Saíndo de Aldosende o primeiro que atoparemos será o miradoiro co mesmo nome que a aldea, seguido do miradoiro Volta do Castelo. Despois iremos dar ao conxunto mosteiral de San Facundo de Ribas de Miño, monumento nacional dende 1982, seguido do miradoiro Adega dos Penedos, o miradoiro a Santa Marta, a aldea Santa Marta e o miradoiro Cabo de Vila.

Todo o roteiro goza dunhas fermosas vistas e en caso de non querer ou poder camiñar, pódese chegar en coche a moitos dos principais puntos de interese.

Espero que vos guste!